छपरा, बिहार में आयोजित सारण इंटरनेशनल फ़िल्म फेस्टिवल में सुप्रसिद्ध युवा कवि अउरी भोजपुरी सिनेमा के इतिहासकार मनोज भावुक के सिनेमा के क्षेत्र में बहुमूल्य शोध आउर योगदान के खातीर सम्मानित कईल गईल। बॉलीवुड अभिनेता अखिलेन्द्र मिश्र आउर जय प्रकाश विश्वविद्यालय के कुलपति डॉ0 हरिकेश सिंह द्वारा संयुक्त रूप से भावुक के सम्मान प्रदान कइल गइल।
छपरा में आयोजित दो दिवसीय फ़िल्म महोत्सव के पहिले दिन 3 दिसम्बर के मनोज भोजपुरी सिनेमा पर एगो लंबा व्याख्यान दिहलन आउर साथे-साथे भोजपुरी सिनेमा के अबहिन तक के सफर पर एगो लघु फ़िल्म दिखईलन। एह फ़िल्म के देखले के बाद मुख्य अतिथि अखिलेन्द्र मिश्र मनोज भावुक के भोजपुरी सिनेमा के मास्टर कहलन। कुलपति डॉ0 हरिकेश सिंह के ई कहनाम बा कि हर विद्यार्थी के ई फ़िल्म अवश्य देखेक चाहीं, डॉक्टर सिंह, मनोज भावुक के BHU में इ फ़िल्म लेके आवे के न्योता देहलन।
मनोज पिछला 25 साल से लगातार भोजपुरी सिनेमा पर काम कर रहल बाने। अमिताभ बच्चन, सुजीत कुमार, राकेश पांडेय, कुणाल सिंह, मनोज तिवारी, रवि किशन समेत डेढ़ सौ से अधिक फ़िल्म स्टार्स के इंटरव्यूज के अलावा टीवी पर भोजपुरी सिनेमा के लेके बहुत सारा शोज कर चुकल बाने। मनोज के भोजपुरी सिनेमा के इनसाइक्लोपीडिया कहल जाला। फ़िल्म महोत्सव में मनोज के आवे वाला किताब भोजपुरी सिनेमा के संसार पर भी चर्चा भईल।
विदित बा कि मनोज सिवान जिला के रघुनाथपुर प्रखंड के कौसड़ गांव के रहे वाला हवन। मनोज भावुक के पिता रामदेव सिंह, हिंडाल्को रेनुकूट के पहिला ट्रेड यूनियन लीडर रह चुकल बानी।
लंदन आउर अफ्रीका में इंजीनियर रह चुकल मनोज मॉरिशस, दुबई, नेपाल, युगांडा समेत दुनिया के तमाम देश में भोजपुरी के परचम लहरा चुकल बाड़न।
आपन ग़ज़ल-संग्रह तस्वीर जिंदगी के आउर गीत-संग्रह चलनी में पानी के खातीर मनोज भावुक के भारतीय भाषा परिषद, भाऊराव देवरस सम्मान, राही मासूम रज़ा सम्मान , गीतांजलि साहित्य आउर संस्कृति बर्मिंघम सम्मान, बिहारी कंनेक्ट दुबई सम्मान, लोक भूषण नेपाल सम्मान आउर पूर्वांचल गौरव, विश्व भोजपुरी गौरव जईसन अनेक सम्मान से नवाजल गईल बा।
सारेगामापा जईसन लोकप्रिय टीवी शो के भोजपुरी में बनावे के श्रेय बतौर प्रोजेक्ट हेड आउर लेखक मनोज भावुक के जाला। भोजपुरी एसोसिएशन ऑफ युगांडा के संस्थापक मनोज भावुक विश्व भोजपुरी सम्मेलन के इंग्लैंड व दिल्ली इकाई के अध्यक्ष रह चुकल बाड़न।
