लंबा समय से इ चर्चा रहे कि,.. गरीब बच्चा खातीर आईआईटी के कोचिंग चलावे वाला ..बिहार के सुपर-30 के संस्थापक… आनंद कुमार के बायोपिक में रितिक रोशन मुख्य भूमिका में नजर अइहें। आखिर तक इ बात प संदेह बनल रहे कि रितिक फिल्म करतारन की ना। बाकी अब इ कन्फर्म हो चुका बा कि रितिक ही फिल्म में आनंद कुमार के लीड रोल में नजर अइहें। अब इ फिल्म के रिलीज के तारीख भी आ गईल बा। सुपर-30 अगीला साल यानी कि साल 2018 में 23 नवंबर के दिनें रिलीज होइ।
फिल्म के निर्देशन क्वीन जइसन सफल फिल्म बना चुकल विकास बहल कर रहल बाड़न अउर प्रोडक्शन के जिम्मेदारी, फैंटम फिल्मस अउर रिलायंस इंटरटेनमेंट के बा। खबर बा कि आनंद कुमार के बायोपिक में करीब 20 बिहारी कलाकार के मौका दिहल जायी अउर उनकर जीवन संघर्ष से लेके छात्र लोग के परिवेश तक के प्रदर्शित कइल जायी।
आनंद कुमार कहलन की हम खुश बानी कि रितिक एह फिल्म के मुख्य किरदार में बाड़न। उ आपन काम के लेके समर्पित रहेलन अउर हमरा के उम्मीद बा कि उ हमार किरदार के संगे जरुर न्याय करिहें। रितिक भी फिल्म के टीम संगे मुलाकात कइलें अउर एह फिल्म से जुड़ल कुछ बात के खुलासा भी कइलन।
फिल्म के कहानी बिहार के रहे वाला आनंद कुमार प आधारित बा, जवन हर साल 30 बच्चा के आईआईटी के मुफ्त कोचिंग देवेलन अउर उनकर कोचिंग के लगभग सब स्टूडेंट आईआईटी में सलेक्ट हो जाला। अभी ले सुपर 30 से लगभग 390 से लेके 450 स्टूडेंट आईआईटी बन चुकल बाड़न। आनंद इ सराहनीय काम खातीर पूर्व राष्ट्रपति प्रणव मुखर्जी से सम्मानित भी हो चुकल बाड़न। कुछ दिनें पहीले आनंद कुमार अमिताभ बच्चन के संगे ‘कौन बनेगा करोड़पति’ के हॉट सीट प भी नज़र आइल रहन अउर उ 25 लाख रुपया भी जितल रहन।
आनंद आपन असल जिन्दगी के कहानी साझा करते हुए बतवलन कि, हमार पिताजी के चाहत रहे की हम अउर पढ़ी लिखी, बाकी अचानक उनकर देहांत भईला से घर के हालत बिगड़ गईल। तब हमार माई पापड़ बनावे शुरू कइली अउर हम आ हमार भाई पापड़ बेचत रही जा। अब देखे के इ बा कि, एह फिल्म में उनकर कहानी के केतना जीवंत करल गइल बा।
